حرصت الفنانة رانيا فريد شوقي على احياء ذكرى وفاة والدها فريد شوقي وذلك من خلال رسالة كتبتها على حسابها الرسمي بموقع تبادل الصور والفيديوهات انستجرام، مشيرة إلى أنها فخورة بكونها ابنتها.

رانيا فريد شوقي عن والدها: الأب الحزين ما بيروحش

وقالت رانيا فريد شوقي في منشور رصده موقع تليجراف الخليج على انستجرام: النهاردة ٢٧ سنة على غيابك يا بابا… بس الأب الحنين ما بيروحش، بيفضل جوه الروح, في فيديو ليك كنت بتقول:"أنا صرفت فلوسي على بناتي… دلعتهم وفسحتهم ومليت عينهم، ناس افتكرت إن الموضوع فلوس، لكن الحقيقة إنك كنت بتستثمر فينا قلبك وعمرك كله، وتزرع جوانا حب وخير وكرامة.

وتابعت: كنت فاهم إن البنت لما تحس إنها غالية في بيتها محدش يقدر يقلل منها دلعتنا عشان نفهم إن الدلع مش منّة من حد، وفسحتنا عشان نشوف الدنيا بعينين شبعانة ومفيش حاجة تبهرنا حتى عقابك كان في سكوتك..  سكوت يحرمنا من ضحكتك وحضنك، وكان أقسى من أي عقاب.

رانيا فريد شوقي لـ والدها: بيتك يا بابا كان مليان حنية وعطاء حتى بالحاجات الصغيرة

واختتمت رانيا فريد شوقي حديثها: كنت ترجع من المسرح في إسكندرية وتجيب لنا فطير بالسكر، حاجة بسيطة منك لكنها كبيرة جوانا، ولحد النهاردة بطلبه عشان أفتكر ضحكتك، في آباء عندهم إمكانيات وما بيدلعوش، وبيوت مليانة فلوس لكنها فاضية من الحب… لكن بيتك يا بابا كان مليان حنية وعطاء حتى بالحاجات الصغيرة، وده اللي ربّى جوانا قلوب شبعانة وأرواح واقفة بثبات.. الله يرحمك يا بابا، ويبارك في كل حاجة زرعتها جوانا.. الحمدلله أن ربنا حلقني بنتك.

رسالة رانيا فريد شوقي لـ فاروق الفيشاوي

وسبق وأحيت رانيا فريد شوقي رسالة لـ فاروق الفيشاوي، قائلا: الذكرى السنوية السادسة لرحيل الفنان والإنسان فاروق الفيشاوي من أطيب وأكرم الناس اللي عرفتهم في حياتي… جدع وابن بلد وصاحب صاحبه بجد، كان ليا الحظ إني اشتغلت معاه كتير، وآخر عمل جمعنا كان مسرحية "الملك لير"، كان دايمًا يناديني: اقعد جنبه "تعالي يا بنت الملك"، ويقعد يحكيلي حكايات تضحك مع  بابا، و قد إيه بيحبه وكان بيعتبره  زي أبوه وبابا كمان كان بيحبه جدًا.. لأنه حقيقي كان إنسان طيب وكريم و جدع و بيحب يعمل خير من قلبه، دايمًا لما يشوفني يسألني: "فريدة هانم عاملة إيه؟" لأن مامته اسمها فريدة، وأنا بنتي الكبيرة كمان اسمها فريدة.. ربنا يرحمك يا راجل يا طيب ويغفر لك ويسكنك فسيح جناته وحشتنا… قوي.