حرصت الفنانة رانيا فريد شوقي على احياء ذكرى وفاة الفنان الراحل فؤاد المهندس، وذلك من خلال كشف عدد من ذكرياته مع والدها فريد شوقي وعمق الصداقة الكبيرة التي كانت بينهم، ليس هذا فقط بل كان فؤاد المهندس أو من يقف بجانب والدها في فترة مرضه.

رانيا فريد شوقي تكشف ذكريات والدها مع فؤاد المهندس 

وقالت رانيا فريد شوقي في منشور رصده موقع تليجراف الخليج عبر حسابه الرسمي بموقع التواصل الاجتماعي فيسبوك:  كان في صداقة كبيرة وحقيقية بين بابا و انكل فؤاد استمرت صداقتهم وزياراتهم لبعض، وخصوصًا لو عرف إن بابا تعبان… كان دايمًا أول واحد ييجي يطمن عليه. وشه الضاحك البشوش كان كفاية يغير الجو كله ويملأ البيت بهجة.

وتابعت رانيا فريد شوقي: كمان الأستاذ سامي المهندس، أخوه، كان صديق لبابا كان عنده شالية في المعمورة و كانوا بيتجمعوا يسهروا يا عندهم يا عندنا في الشالية فاكرة يوم لما بابا كان عيان، جم الاتنين مع بعض يزوروه… ومن كتر ما كانوا شبه بعض افتكرناهم  توأم! أنا و عبير  لكن الحقيقة إنهم كانوا توأم في الروح وخفة الدم والحب الرقي.

رانيا فريد شوقي عن فؤاد المهندس: كان محب للاطفال 

واستكملت رانيا فريد شوقي حديثها عن فؤاد المهندس قائلة: ولو أنا فاكرة صح، كانت عربية الأستاذ فؤاد بيجو لونها نبيتي، وكان محب للأطفال بجد و كان يغنيلنا أغاني  هو اللي مألفها، و بطريقته الشربات يضحكنا كنا لازم نحضر كل مسرحياته مع بابا وماما ومش قادره أنسى يوم حضرنا مسرحية سك على بناتك، والمشهد اللي فيه بيخاف من الفنان زكريا موافي وبيجري وراه، ويدخل الباب الدوّار ويخرج ينادي علينا أنا وأختي: "يا عبير… يا رانيا… الحقوني!" كنا بنضحك و مبسوطين اوي انه  بينادي علينا على المسرح قدام الناس كلها!.

واكدت: مين فينا ماحبش فوازير "عم فؤاد" في رمضان؟ كنا نجري بعد الفطار عشان نشوفها ونحل الفوازير وبابا معانا. وصوته في "كلمتين وبس" كان جزء من صباحنا لحد النهاردة، و مسلسلات و مسرحيات محفوره في الذاكره.

رانيا فريد شوقي: فؤاد المهندس كان أيقونة للبهجة والكوميديا الراقية

وأضافن: والحقيقة إن الأستاذ فؤاد ماكانش بس فنان عظيم… ده كان أيقونة للبهجة والكوميديا الراقية، فنان مثقف، ذكي، أعماله خالدة ولسه بتضحكنا وتفرّح قلوبنا. مدرسة كاملة في الإبداع والالتزام، وصوته وأدواره محفورة في وجدان ملايين المصريين والعرب، بابا كتب مسلسل اسمه روبابيكيا لكنه توفي قبل ما ينفذه. المنتج الأستاذ محمد عمارة راح للأستاذ فؤاد وعرض عليه يقوم بالدور و وافق حبًا في بابا و مجهود بابا في كتابة السيناريو، ذكريات محفورة في القلب مع "الأستاذ" اللي ترك تاريخ كبير وبصمة لا تُنسى في الفن المصري.